Schnitzelbank-Comité


Archiv
Alle anzeigen

Filter anpassen

Zum Archiv

Stächpalme

Steckbrief

Ein spitzer, immergrüner Bank mit roten Beeren. Während über einem Jahrzehnt war die Stechpalme eine feste Comité-Grösse. Wir vermissen sie schmerzlich.
Comité-Bank seit 2006

2019

Video

Verse

Bruchsch hüt s Wort Neger in dr Hascht,
no stohsch mit äim Bäi scho im Knascht.
Das isch ganz in mym Sinn, han ich im Stille überläit: Wehe, wenn mir äin do inne jetz no Rammel säit!

E chläine Root an Groosse Root
zur Linderig vo Schreck und Not:
Diet die, wo am lütschte chrääie, doch um Himmels Wille vor em Gang ans Rednerpult e Viertelstündli stille.

I blang uf s Ozeanium.
Dört draa druck ich denn d Nase chrumm,
wenn Hafner, Thüring, Naegelin sich ganz sälbschtvergässe im Häifischbecki 2 bim Znüni gegesytig frässe.

Im Gänfersee stoht blutt e Herr,
Nom de Dieu: dr Maudet Pierre.
Är säift sich yy und rybt und sprützt, dä trybts immer struuber, doch au mit allne Wasser gwäsche wird er nid ganz suuber.

D Frau Macron säit z Paris zum Maa:
He, lueg mi nid so schnippisch aa.
Du gohsch mir uf e Wecker mit dym goggelhafte Doon. Drum sträik i ab sofort und drääg im Bett e «gilet jaune».

Werte Gäste in den Alpen:
Wenn Sie in Kuhfladen tschalpen
und fluchen, weil Sie stinken, dann vergessen Sie ja nie: Sie würden auch noch hinken, hätte Hörner dieses Vieh.

De Chie fehlts neuerdings an Heu,
an Wasser au de Schoof und Söi.
Wiird dä Summer au so troche, laufe glyy scho stramm d Fisch und Otter uf em Schotter z Fuess uf Rotterdam.

D Amherd und au d Keller-Suter
finde mir dr Wahn, dr luter.
Und bis zur nöggschde häisse Wahl, frohlockt my Fründ, dr Walter, isch jo au d Martullo denn im beschte Mannesalter.

Si ligge im e Doppelzimmer,
bewusstlos, äs wird immer schlimmer.
Dr Engelberger schnuuft fascht nümm, dr Weber macht käi Wank. Dr äinzig Trooscht: Die bäide sin im glyyche Spittel chrank.

Meh als äinisch hets mi dunkt:
Dä FCB verdient e Punkt.
Doch vo vierzig Maa si zwanzg verletzt, acht chrank, fümf schiile, und die, wo nid us Basel sin, die dörfe jo nid spiile.

D Baselworld gseht nur no rot.
D Muschtermäss isch mausedoot.
Mir blybt nur no im Papscht sy Mäss am Sunntig nach de Viere. Das isch die letschti Mäss, wo d gratis Wyy chasch deguschtiere.

E Hirni het er wien e Fliege
und liegt so, dass sich d Bälke biege.
Är strooft sogar no d Höll mit Zöll, si Blick wird immer suurer, är twitteret em Bundesrot: bruch sofort non e Muurer!

Chnorzi-chnorzi-chnorzibüü,
chnorzi-chnorzi-chnorzibüü.
Dasch s Abschiidslied vom Schneider-Ammann und i wett, dass das als neui Landeshymne ächti Chance het.

In dr Bundesrots-WG
hets nach em Zmorge Lämpe geh.
Amherd, Keller-Suter, Somaruga sin am ziggle,
wär dr Cassis vor em Flug nach Brüssel no dörf wiggle.

Nid nur dr Marcel het dr Koller,
au dr Streller mäint, bald roll er,
nid dr Ball, näi, sy Chopf, dr Stocker chas nid fasse.
Mit wäm sell är, wo chuum dörf schutte, jetz denn no go jasse?

Als Maa fliegsch hüt dur jede Tescht,
sogar dr Jesus, stell i fescht.
D Maria Magdalena schimpft: bestreu di Haupt mit Äsche,
versprich mr nie meh s Paradyys und: d Fiess chasch sälber wäsche!

Im Achterdrämmli luegt me grimmig.
S herrscht e lyycht konfuusi Stimmig.
Was d Fahrgescht und dr Drämmlifierer grauehaft verstört: Si hän scho syt Minute vo dr Läitstell nüt meh ghört!

S underirdisch Härzstück stockt.
Dr underirdisch Weschtring schockt.
S underirdisch Parkhuus bruchti dringend non e Dach.
Und denn gits non e Mannschaft, die isch underirdisch schwach.

S letscht Johr hän lut Vogelwarte
vyl Vöögel afo duurestarte,
Doppeladler, Pläitegäier und au allethalbe
uf em griene Raase sälte schöni Neymar-Schwalbe.

Us Indie chunnt dr beschti Tee,
dr beschti Ryys und no vyl meh:
Scho glyy sell s erschte Inderli in Rot und Blau yylaufe.
Das will denn dr Herr Burgener zum beschte Pryys verchaufe.

Im Hafe brennts, bim FCB,
bi BVB und SVP.
Au d Mäss brennt liechterloh und stirbt e häisse Tod uf Rate. Do frogsch di, wie goht Exit um mit so vyl Kandidate.

Impressionen

von

2018

Video

Verse

2018 Stächpalme

I bi bis hüt käi You Tube Star,
ha käi Community – so far.
I tröscht mi mit em Jesus, är isch au en arme Maa
und het wien ich am Afang nur grad zwölf Follower gha.

Käi Stäibock schläckts ewägg, käi Gäiss:
In den Alpen isch es häiss.
D Gletscher schmelze rääiewyys, d Laag isch tryscht bis schyter.
Do loob ich mir die bäide Basel: Doo goht d Yyszyt wyter.

Dass ich zum Wältkulturerb zell
und erscht no immateriell,
isch toll – doo non e Hiiwyys zur Erbouig vo de Gmieter:
D Helfti vo däm Erb si materielli Baselbieter.

Dr Wessels isch nach Rom ufbroche.
Worum? Är wird dört häilig gsproche!
Dr Papscht belohnt dr Hampe für sy chrischtlig Grundidee.
Die lutet jo syt je: geh isch seliger als neh.

Dr Lieschtler Stapi Lukas Ott
spiilt neu in Basel liebe Gott.
Drfür zieht d Achermaa uf Buus, wo si, no voll im Saft,
im Mai 2050 s Konzäpt fürs Schnapsmuseum schafft.

Im Wald, do balge sich zwee Kläffer,
e fäisse Fluumer und e Bäffer.
S isch klar, dass si dr Sinn vom Läbe blind begriffe häi:
Kläff lüter als dr Find und schiff em denn no gschwind ans Bäi.

S git läider nid meh AHV.
Was wird us mir und myner Frau?
I ha käi zwäiti, dritti Süüle, dir, mir droht dr Brexit.
Als letschti Süüle blybe nur no Cumulus und Exit.

Natürlisch isch aab Monsieur Fringer
nischt nur gewickelt um den Finger.
Isch aab gespuckt, geohrfeigt und mit Fäusten ihn traktiert,
doch weil isch bin für Fairplay, ihn nischt ganz exekutiert.

Dr Trump het gnueg vom Wysse Huus und wird neu Chef vo Twitter.
Dr Papscht hürotet d Lindsey Vonn und landet hinder Gitter.
D Merkel stalkt dr Macron znacht im Dusel vor em Huus.
D Queen kifft mit em Butler – ich ha voll dr Fake News Blues.

Jetz gohts em Santichlaus an Chraage.
Die alt Frau Niggli isch am Chlaage:
Är häig ere vor achtzig Johr, si häig das lang verdrängt,
won er se in Sack gsteckt häig, ans lingge Schiinbäi glängt.

Im Vollsuff torklet äin in d Chille.
Dr Pfarrer rieft: um Himmels Wille,
ich schick Sii, Monsieur Buttet, mit em Darbelley uf Lourdes,
au wenn lut Häiland d Häilig vo so Schyynhäilige duurt.
E Buur vo Buus het in sym Stall im Fall die gröschti Mieh:
Chuum foht er afo mälche, blöke syni Chie.
Si grunze, wenn si brunzen oder schysse, s isch e Gruus.
Jetz het dä Buur wäg syne Chie au scho dr Fake News Blues.

Wäg deere Söilischlachterei
in Sissach gits e wältwyts Gschrei.
Derby schlachte jo d Baselbieter fascht scho mörderlich
das unschuldige Trämmli bi Margrete mit äim Stich.

I ha an ere Tombola e WC-Rolle gunne
und yytuscht no an Ort gege Niveacrème für d Sunne.
Die Crème het mir äin abkauft, iich derfür sy Sennehund.
Dä han i tüschlet gegen e Klavier, jo, mir laufts rund.
Für das Klavier und vier, fümf Bier han ich e Yacht bychoo
und, statt die ins Wasser z loh, Roche-Aktien übernoh.
Die Aktie han i, zagg, gegen e Nobelhotel tuscht,
bi flugs in d Luxussuite gruscht, my Schatz isch zue mer ghuscht.
I ha mym Spätzli Diamante, mir zäh Bitcoin boschtet.
Das alles het chly meh als my Nobelhotel koschtet.
Dummerwyys het denn e Wäschpi in die Bitcoin gstoche.
Die si platzt und s Hotel samt mym Spatz isch zämmebroche.
Jetz hock i uf dr Strooss, d Frau bin i los, i fühl mi gscholle:
My Bloose druckt, my Darm rumort – mir fehlt my WC-Rolle.
D Sunne brennt, i ha käi Crème, ich armi Chillemuus
ha au käi Troscht vom Hund – i ha dr Bitcoinbloose Blues.

Impressionen

von

2017

Video

Verse

I triff my Fründ z New York, bi zwääg,
verzell vo de drei scheenschte Dääg.
Do mäint dä: Liebe Bebbi, bitte wird vor Nyyd nid bläich.
Bi uns im Wysse Huus gits jede Daag e Morgestraich.

Was het dr Morin hinderloh,
e Spur im Sand? Jä, aber wo?
Sand het är e Huffe gha und was iin bsunders freut:
Är het en sich am liebschte in die äignen Auge gstreut.

D Frau Herzog zellt au nach de Wahle
zaggig iri schwarze Zahle.
Nur äine isch bim Zelle no e ganze Zagge schnäller.
Dr Baschi Dürr zellt ganz vergiftet d Lyychen in sym Chäller.

Es wott die guet Frau Pegoraro
bim Umwält-Abo spare, klaro.
Ich bruchs jo nur no äinisch, strahlt si, s lyt glaub uf dr Hand,
denn morn fahr ich us Lieschtel Town diräkt ins Pfäfferland.

Im Verglyych zum Benthaus isch er
e Nüssli, eusen Ursli Fischer.
Dr Janko het nur gschloofe, dr Delgado isch nümm gsprinteret.
Käi Wunder, dass me so nid europäisch überwinteret.

Jä, sage Si, Herr Darbelley,
hets uf dr Jagd e Blattschuss geh?
Gälle Si, dä Schuss isch voll ins Schwarze – sone Mischt.
Mi dunkt das alles halb so schlimm, Hauptsach, es git e Chrischt.

My Grosi, s Rosi, isch verscholle,
samt Handy, dä arm Syydebolle.
Me het nur sy Rollator gfunde, unde z Chembs am Ryy.
Es syg schyyns some gäggeligääle Pokemon hindedryy.

D Somaruga lauft dervo.
Si häig miessen uf s WC goh.
Mi erstuunt das nid, mir gohts jo gnau glyych nöimeduure,
päng grieg ich dr Dünnpiff, wenn dä Köppel afoht schnuure.

Ich halbier, i finds famos,
my äige CO2-Usstooss
uf CO1 – s isch wichtig, dass jetz ändlig öppis goht.
S Dumm isch nur, nach churzer Zyt, do bin iich mausetot.

Liebe Mobiliar, s ist klar,
was ich schreib, ist völlig wahr.
Die Scherbenhaufen hab ich nicht gemacht, ich bin kein Lump.
Sie stammen von dem Rest der Welt, bless you, Donald Trump.

My Frau schwümmt gärn im Eglisee,
doch hüt macht ere s Bade weh.
Die mit blutte Schwabbelbrüscht, si chas nid verstoh,
loht me und die schön Verhüllte wärden uusegnoh.

Was liis ich doo in myner BaZ:
D Frau Gschwind macht em e Neue Platz.
Si sälber wärd Dozäntin, doo dra gebs nüt z rüttle,
am Uni Standort Lieschtel – für Chopf- und Händeschüttle.

I ha ne Schneekanone kauft,
ganz gewaltig, wie die lauft.
Vom WC us beschneit si d Wohnig, d Ferie si e Gnuss:
D Stägen abe wäädle, wärend s nüt as schifft voruss.

D Queen in London schnuuft ganz flach,
s Land het mit dr EU Krach.
Dr Charly tröschtet: Mummy, froh zu sein bedarf es wenig.
Au mit Brexit blybsch du Queen – und ich wird niemols König.

My Muggedätscher isch parat,
doch zum dää verquätsche, isch er mer z schad ...

Impressionen

von

2015

Video

Verse

Am Rand vo dere Wält läbt stramm
e letschten indigene Stamm.
Mit dumpfe Gsäng und Zaubersprüch erregt är d Forschergmieter.
Är hüült in d Nacht bim Tanz ums Füür: mir blyybe Baselbieter.

D BVB het d Chance packt.
Si fahrt jetz im Sekundetakt
uf Weil und will die arme Bebbi so vill miesse trääge,
verchehrt dr 8er exklusiv nur no mit Gieterwääge.

Au ich ha rassig Euro poschtet
und mi drno in 8er gmoschtet.
Und wills mi intressiert, was mit de Schwyzer Aktie lauft,
ha mer z Weil als Erschts e tolli Tauchusrüschtig kauft.

Dr Oschterhaas git zue: jäwohl,
ich out mi, ich bi inne hohl.
D Frau Vischer, wo im Garte stoht, im Gras grad näbem Haas,
frogt ufgregt: isch denn der Herr Wessels au en Oschterhaas?

Dr Muurer Ueli isch im Wald
bim Biken an e Felse knallt.
Entwarnig, funkt dr Funker Hotz an sym Funkertisch.
Är isch nid detoniert, will är e Blindgänger isch.

Z Bärn gits bald e neue Lidl,
z Biel dr Gyygelade „Fyydl“.
Z Basel plant e Hundefreak dr Hundesalon „Wuff“.
Und z Bade macht dr Geri glyy sy Hoseladen uf.

My Frau, si schafft jetz au bi Apple,
het iPhone, iWatch und iTschäppel,
het Äi-Zällen yygfroore, wäg dr Karriere.
Jetz freu mi, bis i äi-nisch darf mit ere verchehre ...

Dank Lehrplan 21 glänze
d Goofe mit zig Kompetänze.
Statt Mathe leert dr Maxli neu als Erschts: wie mach ich Spesen?
Sobald er das dann kann, geht es ans Leasen (anstatt Lesen).

Hänsel und Gretel verirrten sich im Wald.
Es war so finschter und auch so bitter kalt.
Sie kamen an kein Häuschen und blieben drum verschwunden,
trotz GPS im Handy – der Akku war halt dunden.

Im Thurnheer Beni syni Schnuure
mag zwar nümm, doch zwüscheduure
schnuurt sy munter wyter, das trotz Publikums-Beschwärde.
Die Schnuure well schyyns no Unesco Wältkulturerb wärde.

Dr Kim Jong Un isch gääl und rund.
Me munklet, är syg nümm so gsund.
Es chiem drvo, dass är nur no dieg Ämmitaler schmatze.
Stell dr vor dä Chees-Tsunami, wenn dä Kim wurd platze.

Im Gfängnis strickt dr Hoeness Ulli,
will er friert, am ene Pulli.
Dr Wärter rieft in d Doppelzälle: dr Diräkter schickt
morn dr Blatter Sepp zu dir, dä het sich au verstrickt.

Dr Bundesroot isch irritiert.
Das isch jetz doch no nie passiert.
Zum erschte Mol in all de Johr wird d Session verschoobe.
Dr Nationalroot Müller häig schyyns d Hose noni doobe.

Dr Max, e Baselbieter Daggel,
macht nach em Znacht no rasch e Waggel.
Är lauft im Sturmschritt Richtig Stadt, won är sich nid lang ziert
und heftig mit dr nöggschde Pudeldame fusioniert.

Alli Äntli boue glyy
neui Näschtli doo am Ryy.
Hööch über den Äntli bout e stolze Schwan sy Näscht.
In dere schreege Chischte z nischte, gääb mir glatt dr Räscht.

My Frau vollfiert e Höllegschrei,
si häig jetz au e Freistossspray.
Won ich nid abwäsch, rieft si: Foul, drufabe sprayt si stur
Rasierschuum uf e Teppig und schiesst gnadelos in d Mu(-aua!-)ur.

I stand zmitts in dr Freie Strooss.
S isch nüüni znacht und nüt meh los.
Drum fahr i Richtig Hörnli mit em Trämmli Nummer säggs.
Im Friidhof si jo wenigschtens no Rehli underwäggs.

D Frau Stutz isch läider nid im Strumpf,
im Gegetäil: voll uf em Rumpf.
Si wälzt sich uf em Buuch und cha im Unterrock chuum schnuufe.
D Lunge druckt und d Zunge zuckt und s zieht dr Chiifer uufe.
Dr Kräislauf isch total verräist und d Niere dehydriert.
Käi Wunder, dass d Frau Stutz syt Stunde hyperventiliert.
Dr Dokter mäint mit churzem Blick uf e neu Unterrock:
Frau Stutz, Si häi nach irem Trip uf Weil e Tiefpryysschock.

I wäiss, i cha nid so schön singe,
und wenn i myni Värs due bringe,
hocked dir im Publikum mäischtens wie uf Noodle,
doch syt i Jod-Tablette schluck, joo, do chan ich jodle ...

Impressionen

von